Yeni başlayan münasibətlərdə ən çox edilən 10 SƏHV

Yeni başlayan münasibətlərin ilk günləri adətən həyəcan, romantika və qarşılıqlı maraqla müşayiət olunur. Mesajlar sürətlə cavablandırılır, görüşlər xüsusi hiss etdirir və hər detal daha təsirli görünür. Lakin mütəxəssislər bildirirlər ki, münasibət bir qədər dərinləşdikdən, real həyat və fərdi xarakter xüsusiyyətləri ortaya çıxdıqdan sonra cütlüklər fərqində olmadan bəzi davranış səhvləri edə bilirlər. Bu səhvlər isə münasibətdə gərginliyə və anlaşılmazlıqlara səbəb ola bilər.

Az24.az xəbər verir ki, psixoloqlar yeni münasibət yaşayan cütlüklərin ən çox buraxdığı 10 yanlışı açıqlayıb:

1.Hər şeyi mükəmməl etməyə çalışmaq

Mütəxəssislər bildirir ki, münasibətdə hər anın “ideal” olmasını gözləmək həm insanı, həm də tərəf müqabilini psixoloji olaraq yorur. Həyatdakı kiçik axsaqlıqları qəbul etmək münasibəti daha sağlam edir.

2. Hər detalı dərhal paylaşmaq

Yeni münasibətin sevincini dostlarla və sosial mediada bölüşmək cazibədar görünür, amma mütəxəssislər bir qədər zaman tanımağın və münasibətin öz axarında dərinləşməsinə imkan verməyin daha doğru olduğunu deyirlər.

3. Həddən artıq qısqanmaq

Qısqanclığın normadan artıq olması münasibətdə güvənsizlik yaradır. Mütəxəssislər sərhədlərin açıq şəkildə müəyyən edilməsini və nəzarətçi davranışlardan uzaq durmağı tövsiyə edir.

4. Həddindən artıq planlama

Hər görüşü, hər tətili və hər anı əvvəlcədən planlamaq spontanlığı öldürür. Bəzən səbəbsiz bir qəhvə fasiləsi və ya qısa bir gəzinti münasibətə daha çox canlılıq qatır.

5. Öz həyatını unutmaq

Yeni münasibətin həyəcanı fonunda şəxsi hobbilərdən, dost çevrəsindən və gündəlik vərdişlərdən uzaqlaşmaq, zamanla balanssızlığa səbəb olur. Psixoloqlar şəxsi sərhədləri qorumağın vacib olduğunu vurğulayır.

6. Müzakirədən qaçmaq

Kiçik anlaşılmazlıqların üzərindən keçmək, problem yaratmamaq üçün susmaq münasibətdə yığılan gərginliyə yol açır. Sağlam dialoq və zamanında danışmaq münasibətin daha möhkəm olmasını təmin edir.

7. Həddindən artıq gözləntilər

Tərəf müqabildən hər zaman eyni davranışı göstərməsini gözləmək reallığa uyğun deyil. Mütəxəssislər münasibətin təbii olaraq eniş-yoxuşlu olduğunu xatırladır.

8. Sosial mediada münasibəti “şişirtmək”

Hər anı paylaşmaq, mükəmməl cütlük imici yaratmaq istəyi münasibətə əlavə təzyiq yaradır. Bəzi məqamları şəxsi saxlamaq daha sağlamdır.

9. Hədiyyə və jestləri abartmaq

Daim bahalı hədiyyələr almaq və ya böyük jestlər gözləmək münasibətdə təbii olmayan dinamika yaradır. Kiçik, mənalı jestlər isə daha dəyərlidir.

10. Tərəf müqabilini dəyişməyə çalışmaq

Mütəxəssislər bildirir ki, insanın xasiyyətini tam dəyişmək mümkün deyil. Sadəcə qarşılıqlı anlaşma ilə bəzi vərdişləri yumşaltmaq və uyğunlaşmaq mümkündür.

Nəticə olaraq psixoloqlar vurğulayır ki, sağlam münasibətin təməli qarşılıqlı hörmət, balans, düzgün ünsiyyət və real gözləntilər üzərində qurulur. Yeni başlayan münasibətlərdə bu səhvlərdən yayınmaq isə əlaqənin daha güclü şəkildə formalaşmasına kömək edir.