Uşaqlarda yüksək temperatur nə vaxt təhlükəlidir? – Valideynlərin NƏZƏRİNƏ

Uşaqlarda bədən hərarətinin yüksəlməsi valideynlərin ən çox narahat olduğu hallardan biridir. Mütəxəssislərin fikrincə, qızdırma əksər hallarda orqanizmin infeksiya ilə mübarizə apardığını göstərən təbii reaksiyadır. Lakin bəzi hallarda yüksək hərarət təhlükəli vəziyyətin göstəricisi ola bilər.

Normal halda uşaqlarda bədən temperaturu 36–37,5 dərəcə arasında dəyişir. Hərarətin 38 dərəcəni keçməsi artıq yüksək hesab olunur. Xüsusilə 39 dərəcə və daha yuxarı göstəricilər ciddi nəzarət tələb edir.

Mütəxəssislər bildirirlər ki, 3 aydan kiçik körpələrdə 38 dərəcədən yuxarı hərarət təhlükəli sayılır və bu zaman dərhal həkimə müraciət edilməlidir. Eyni zamanda hərarətin 2–3 gündən çox davam etməsi, dərmanlara baxmayaraq düşməməsi riskli əlamət kimi qiymətləndirilir.

Yüksək hərarətlə yanaşı uşağın halsızlaşması, süstlük, qusma, ishal, nəfəs darlığı, qıcolma, dəridə səpkilərin yaranması və ya uşağın maye qəbulundan imtina etməsi də ciddi təhlükə siqnallarıdır.

Həkimlər qeyd edirlər ki, uşaqlarda qızdırmanın əsas səbəbləri virus və bakterial infeksiyalar, boğaz və qulaq iltihabı, peyvənddən sonrakı reaksiyalar, nadir hallarda isə günvurma və susuzluq ola bilər. Diş çıxarma dövründə də hərarət arta bilər, lakin bu adətən 38 dərəcədən yuxarı olmur.

Valideynlərə uşağa bol maye vermək, onu qalın geyimlə bürüməmək, otağın havasını sərin saxlamaq və hərarəti mütəmadi ölçmək tövsiyə olunur. Həkim məsləhəti olmadan dərman dozasının artırılması isə yolverilməzdir.

Mütəxəssislər vurğulayırlar ki, hərarətin səviyyəsi ilə yanaşı uşağın ümumi vəziyyəti də diqqətlə izlənilməlidir. Şübhəli hallarda vaxt itirmədən tibbi yardıma müraciət etmək ən doğru addım hesab olunur.

Altay