Ümummilli Lider Heydər Əliyevin vəfatından 22 il ötür

Bu gün Azərbaycan xalqının Ümummilli Lideri Heydər Əliyevin vəfatından 22 il keçir. Ulu Öndərin xatirəsi ölkəmizdə və xarici ölkələrdə böyük ehtiramla anılır.

Heydər Əlirza oğlu Əliyev 1923-cü il mayın 10-da Naxçıvanda anadan olub. O, 1944-cü ildən təhlükəsizlik orqanlarında xidmətə başlayıb, 1964-cü ildə Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildə isə sədri təyin edilib və general-mayor rütbəsinə yüksəlib. Həmin dövrdə Leninqradda xüsusi ali təhsil alıb, 1957-ci ildə Azərbaycan Dövlət Universitetinin tarix fakültəsini bitirib.

1969-cu ilin iyul plenumunda Heydər Əliyev Azərbaycan SSR Kommunist Partiyası Mərkəzi Komitəsinin birinci katibi seçilib. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü olaraq SSRİ Nazirlər Soveti sədrinin birinci müavini vəzifəsinə təyin edilib.

Heydər Əliyev 1987-ci ilin oktyabrında SSRİ rəhbərliyinin siyasi xəttinə etiraz olaraq tutduğu yüksək vəzifələrdən istefa verib. 1990-cı il 20 Yanvar faciəsindən sonra o, Moskvada Azərbaycanın nümayəndəliyində bəyanatla çıxış edərək, günahkarların cəzalandırılmasını tələb edib. Qarabağ münaqişəsi ilə bağlı SSRİ rəhbərliyinin ədalətsiz mövqeyinə etiraz olaraq, 1991-ci ildə Kommunist Partiyasının sıralarını tərk edib.

1990-cı ildə Azərbaycana qayıdan Heydər Əliyev əvvəl Bakıda, daha sonra Naxçıvanda yaşayıb və həmin il Azərbaycan Ali Sovetinə deputat seçilib. 1991–1993-cü illərdə Naxçıvan Muxtar Respublikası Ali Məclisinin sədri və Azərbaycan Respublikası Ali Soveti sədrinin müavini vəzifələrində çalışıb. 1992-ci ildə Yeni Azərbaycan Partiyasının təsis qurultayında partiyanın sədri seçilib.

1993-cü il iyunun 15-də Azərbaycan Ali Sovetinin sədri seçilən Heydər Əliyev, iyunun 24-də Milli Məclisin qərarı ilə Prezident səlahiyyətlərini icra etməyə başlayıb. 1993-cü il oktyabrın 3-də və 1998-ci il oktyabrın 11-də keçirilən seçkilərdə Azərbaycan Respublikasının Prezidenti seçilib.

2003-cü il prezident seçkilərində iştirakdan səhhəti ilə bağlı imtina edən Heydər Əliyev ABŞ-ın Klivlend Klinikasında müalicə alırdı. Ulu Öndər 2003-cü il dekabrın 12-də vəfat edib və Fəxri xiyabanda dəfn olunub.