Televiziyada ağzınıza gələni danışsanız cərimə olmayacaq – VİDEO

Audiovizual Şuranın sədri İsmət Səttarov efirdə dil qaydalarının pozulması ilə bağlı 1000 manata qədər cərimələrin tətbiq ediləcəyini açıqlayıb.

Az24.az xəbər verir ki, Əməkdar artist Tahir İmanov Şura sədrinin bu açıqlamasına instaqram hesabında ironik video ilə münasibət bildirib.

“Televiziyada yeni cərimələr tətbiq olunub. Beləliklə, televiziya verilişində “ok” sözünü işlədən 500 manat cərimə olunacaq. “Vauu” sözünə görə 500 manat, “karoçi” sözünə görə də 500 manat cərimələnəcəksiniz. Mən “uje” 1500 manatlıq cərimə etdim. Üzr istəyirəm, “uje” dedim, cərimə 2000 min manat oldu. Amma televiziyada ağzınıza gələni danışsanız, bayağı musiqi təbliğ etsəniz, heç bir cərimə olmayacaq”, – Əməkdar artist vurğulayıb.

Qeyd edək ki, İ.Səttarov açıqlamasında bildirib ki, Şura verilişlərin monitorinqində süni intellektdən istifadə etməyə başlayıb. Nəticədə aparıcılar tərəfindən təxminən 3 min dəfə xarici sözlərdən istifadə edildiyi müəyyənləşib. Məsələn, “ok” sözü 104 dəfə səsləndirilib.

Onun sözlərinə görə, yanvardan etibarən bu məlumatlar telekanallara göndəriləcək. 3 aydan sonra Şura dil haqqında qanundan irəli gələrək 500 manatdan 1000 manata qədər cərimələr tətbiq edəcək.