Təkərlərdə hava tez azalırsa SƏBƏBİ BUDUR

Avtomobil sahiblərinin tez-tez qarşılaşdığı problemlərdən biri də təkərlərdə havanın qısa müddətdə azalmasıdır. Bu hal həm təhlükəsizlik, həm də yanacaq sərfiyyatı baxımından ciddi risk yarada bilər.

Ən çox rast gəlinən səbəblərdən biri təkərin üzərində yaranan xırda deşiklərdir. Mismar, şüşə parçası və ya iti metal qalıqları təkərə batdıqda hava tədricən çölə çıxa bilər və sürücü bunu dərhal hiss etməyə bilər.

Digər geniş yayılmış səbəb isə ventil (hava klapanı) nasazlığıdır. Vaxt keçdikcə ventil rezini köhnəlir, çatlayır və hava sızmasına səbəb olur. Bu problem xüsusilə mövsüm dəyişikliklərində daha çox üzə çıxır.

Disklə təkər arasındakı sızma da havanın azalmasına təsir edən amillərdəndir. Diskin əyilməsi, paslanması və ya düzgün oturmaması nəticəsində hava kənara çıxa bilər. Bu hal əsasən yol çalalarına düşdükdən sonra müşahidə olunur.

Temperatur dəyişiklikləri də təkər təzyiqinə birbaşa təsir edir. Soyuq havalarda təkərin içindəki hava sıxılır və təzyiq azalır. Bu səbəbdən qış aylarında təkərlərdə hava daha tez azalırmış kimi görünə bilər.

Mütəxəssislər təkərlərin təzyiqinin mütəmadi yoxlanılmasını və hava tez azalarsa, problemin səbəbinin vaxtında araşdırılmasını tövsiyə edirlər. Vaxtında tədbir görülmədikdə bu hal təkərin sıradan çıxmasına və yol qəzası riskinin artmasına səbəb ola bilər.

Altay