Sükanı buraxanda avtomobil niyə sağa və ya sola çəkir? – Sürücülərə VACİB XƏBƏR

Avtomobili idarə edərkən sükanı qısa müddətlik buraxan kimi maşının sağa və ya sola yönəlməsi bir çox sürücünün qarşılaşdığı geniş yayılmış problemdir. Mütəxəssislər bildirir ki, bu hal təkcə rahatlığı pozmur, eyni zamanda yol təhlükəsizliyi baxımından ciddi risk yaradır.

Avtoservis ustalarının sözlərinə görə, avtomobilin bir tərəfə çəkməsinin əsas səbəblərindən biri təkərlərin düzgün balanslaşdırılmaması və ya “razval-sxojdeniya”nın pozulmasıdır. Təkərlərin bucaqları normadan kənara çıxdıqda maşın düz xətt üzrə hərəkət edə bilmir və sükan buraxılan anda istiqamətini dəyişir.

Digər mühüm səbəb təkərlərdə hava təzyiqinin fərqli olmasıdır. Ön təkərlərdən birində hava az və ya çox olduqda avtomobil həmin tərəfə doğru çəkir. Bu isə sürücünün sükanı daim düzəltməsinə məcbur edir.

Mütəxəssislər həmçinin əyləc sistemindəki nasazlıqları da risk faktoru kimi göstərirlər. Əyləc supportlarının ilişməsi və ya əyləc yastiqçalarının bərabər aşınmaması nəticəsində təkərlərdən biri digərinə nisbətən daha çox müqavimət göstərir və bu da avtomobilin istiqamətinə təsir edir.

Asqı və sükan sistemində olan problemlər – amortizatorların zəifləməsi, rezin-metal elementlərin köhnəlməsi və sükan çubuqlarındakı boşluqlar da maşının yolda sabitliyini azaldır. Nəticədə avtomobil sükan buraxılan kimi sağa və ya sola çəkə bilir.

Yol örtüyü və yolun meyilli olması da qısa məsafədə istiqamət dəyişməsinə səbəb ola bilər. Lakin bu təsir adətən müvəqqəti olur. Əgər avtomobil demək olar ki, hər yerdə eyni tərəfə çəkirsə, problem texniki nasazlıqdan qaynaqlanır.

Mütəxəssislər sürücülərə tövsiyə edirlər ki, belə hallarla qarşılaşdıqda problemi gözardı etməsinlər və avtomobili mütləq texniki baxışdan keçirsinlər. Vaxtında görülən tədbirlər həm əlavə xərclərin qarşısını alır, həm də qəza riskini minimuma endirir.

Dəniz