Onlayn ödənişlərdə ən çox edilən 5 səhv – DİQQƏT

Rəqəmsal ödənişlərin artması ilə yanaşı, internet fırıldaqçılığı da genişlənir. Əksər istifadəçilər sadə səhvlər səbəbindən bank kartı məlumatlarını, pullarını və şəxsi məlumatlarını itirirlər. Mütəxəssislər bildirirlər ki, aşağıdakı yayğın səhvlər online ödənişlər zamanı ən böyük təhlükə yaradır.

1. Şübhəli keçidlərə (linklərə) klikləmək

Fırıldaqçılar sosial şəbəkə, mesajlaşma tətbiqləri və e-poçt vasitəsilə saxta ödəniş keçidləri göndərirlər. Bu linklər adətən bank və ya kuryer şirkətinin adına bənzədilir. İstifadəçi daxil olduqda kart məlumatları oğurlana bilər.

2. Kart məlumatlarını zəmanətsiz saytlara daxil etmək

“http” ilə başlayan, kilid işarəsi olmayan saytlar ödəniş üçün təhlükəlidir. Belə platformalarda daxil edilən kart məlumatları üçüncü şəxslər tərəfindən asanlıqla ələ keçirilə bilər.

3. Cihazda antivirus və təhlükəsizlik tətbiqlərinin olmaması

Zərərli proqramlar (malware) mobil telefon və kompüterdə saxlanılan kart məlumatlarını, SMS-kodları avtomatik oxuya bilir. Bu səbəbdən təhlükəsizlik tətbiqlərindən istifadə vacibdir.

4. Şəxsi məlumatların tanımadığınız şəxslərlə paylaşılması

Sosial şəbəkələrdə “çəkiliş”, “bonus”, “endirim” adı ilə istifadəçilərdən kart nömrəsi, CVV kodu və SMS təsdiqləmə kodu tələb olunur. Bank heç vaxt belə məlumatları istəmir. Bu tip paylaşım birbaşa pulların itirilməsi ilə nəticələnə bilər.

5. Eyni şifrəni bütün hesablar üçün istifadə etmək

Fırıldaqçılar bir platformaya sızdıqda həmin şifrə ilə istifadəçinin digər ödəniş sistemlərinə də giriş etməyə çalışırlar. Eyni şifrədən istifadə edilməsi kiberhücum riskini xeyli artırır.

Altay