Ölülərlə rəqs, pomidor döyüşü, saxta dəfn – Dünyanın ən ağlasığmaz adətləri

Dünya xəritəsinə baxdıqda ölkələr arasındakı sərhədlər bizə yalnız coğrafi fərqləri göstərir. Əsl sərhədlər isə insanların düşüncəsində, inanclarında və gündəlik həyat tərzində gizlidir. Bir yerdə adi sayılan davranış, başqa bir məkanda heyrət, hətta şok doğura bilər. Məhz bu fərqliliklər bəşəriyyəti həm ayırır, həm də bir-birinə maraqlı edir.

Müasir texnologiya və qloballaşma dünyanı kiçildib, mədəniyyətləri bir-birinə yaxınlaşdırsa da, bəzi adətlər zamanın axınına müqavimət göstərərək bu günə qədər yaşamaqda davam edir. İnsanları heyrətləndirən, sosial şəbəkələrdə müzakirə yaradan bu ənənələr əslində bir sualı gündəmə gətirir: normal nədir və qəribə anlayışı kimə görə müəyyən edilir?

Bu yazıda dünyanın müxtəlif guşələrində qorunub saxlanılan, görənləri təəccübləndirən və bəzən ağlasığmaz görünən adətlərə nəzər salırıq. Həmin adətlər bizə bir daha xatırladır ki, dünya yalnız fərqli dillərdən deyil, fərqli həyat fəlsəfələrindən ibarətdir.

İspaniya – Pomidor döyüşü (La Tomatina)
Hər il minlərlə insan küçələrə axışır və bir-birini tonlarla pomidorla “atəşə tutur”. Küçələr qırmızıya boyanır, şəhər isə bir günlüyə nəhəng sous qabına çevrilir.

Danimarka – Subaylara darçın səpmək
25 yaşına çatıb evlənməyən şəxslər dostları tərəfindən darçına “bürünür”. Bu, zarafatla qarışıq ictimai mesajdır.

Şotlandiya – Gəlini çirkaba salmaq
Toydan əvvəl gəlini zibillə, palçıqla, yumurta və unla çirkləndirirlər. Düşünülür ki, bundan sonra ailə həyatında onu heç nə qorxutmaz.

Cənubi Afrika – Qarışqa ilə yetkinlik testi
Bəzi qəbilələrdə oğlanların yetkinliyini yoxlamaq üçün onların bədəninə qarışqalar buraxılır. Kim ağrıya dözürsə, kişi sayılır.

Boliviya – Kəllə bayramı
İnsanlar real insan kəllələrini evlərində saxlayır, bəzəyir və inanırlar ki, bu kəllələr onları bədbəxtlikdən qoruyur.

Almaniya – Dostun qabını sındırmaq
Toydan əvvəl dostlar cütlüyün qab-qacağını sındırır, cütlük isə birlikdə təmizləyir. Məna budur: problemləri birlikdə həll etməyi öyrənmək.

İndoneziya – Ölülərlə yenidən görüş
Toraja qəbiləsində ölülər dəfn edildikdən illər sonra qəbirdən çıxarılır, təmizlənir, yeni paltar geyindirilir və ailə üzvləri ilə “gəzintiyə” aparılır. Onlar üçün ölüm ayrılıq deyil, həyatın başqa mərhələsidir.

Yaponiya – Yad insanlarla qucaqlaşma kafeləri
Böyük şəhərlərdə yalnız qucaqlaşmaq üçün fəaliyyət göstərən kafelər var. İnsanlar stresdən, tənha həyat tərzindən xilas olmaq üçün tanımadıqları şəxslərlə bir neçə dəqiqəlik qucaqlaşmağa pul ödəyirlər.

Hindistan – Siçovulların müqəddəsliyi
Karni Mata məbədində minlərlə siçovul sərbəst gəzir. Onlara toxunmaq, yemək vermək uğur sayılır. Təsadüfən siçovulu əzən şəxs isə onu qızıldan heykəl ilə “əvəz etməlidir”.

Madaqaskar – Ölülərlə rəqs
“Famadihana” adlı mərasimdə ailələr ölülərin qalıqlarını çıxarır, musiqi sədaları altında onlarla rəqs edir. Məqsəd ruhlarla əlaqəni möhkəmləndirməkdir.

Tayland – Meyitlə toy mərasimi
Bəzi bölgələrdə insanlar dünyasını dəyişmiş nişanlısı ilə simvolik toy edir. İnanılır ki, bu, ruhu rahatladır və ailəni bədbəxtlikdən qoruyur.

Cənubi Koreya – Saxta dəfn mərasimi
İnsanlar həyatın dəyərini anlamaq üçün öz dəfn mərasimlərini yaşayırlar: tabuta uzanır, qaranlıqda düşünür, “ölüm sonrası” həyata fərqli baxışla qayıdırlar.

Dəniz