Nar qabıqlarını ATMAYIN! – İnanılmaz faydaları var

Nar qabığı, gündəlik həyatımızda çox vaxt atılan bir hissə olsa da, təbiətin orqanizmimiz üçün verdiyi dəyərli bir hədiyyədir. Onun tərkibində olan antioksidantlar, flavonoidlər və taninlər, insan sağlamlığı üçün çoxsaylı faydalar təmin edir.

Xalq təbabətində nar qabığı mədə-bağırsaq sisteminin qorunmasında mühüm rol oynayır. İshalın qarşısını almağa, bağırsaqları möhkəmləndirməyə və mədə iltihabını azaldmağa yardımçı olur. Həmçinin, orqanizmin infeksiyalara qarşı müqavimətini gücləndirir və bağırsaq problemlərinin müalicəsində istifadə olunur.

Antibakterial və antiviral təsirləri sayəsində nar qabığı ağız və boğaz sağlamlığını qorumaqda da təsirlidir. Boğaz ağrısını yüngülləşdirir, diş əti problemlərinin qarşısını alır və ağızda xoşagəlməz qoxunun yaranmasına mane olur. Xarici istifadə formalarında isə iltihablı dəri sahələrində yaraların tez sağalmasına yardımçı olur.

Ürək-damar sistemi üçün də faydalıdır. Qan dövranını yaxşılaşdırır, damarların sağlamlığını qoruyur və xolesterinin səviyyəsini normallaşdırmağa kömək edir. Antioksidant tərkibi hüceyrələri sərbəst radikalların zərərli təsirindən qoruyur, erkən qocalma prosesini yavaşladır və ümumi sağlamlığı gücləndirir.

Nar qabığını çay kimi dəmləyərək içmək və ya qarqarada istifadə etmək mümkündür. Çay şəklində dəmlənmiş nar qabığı bədənə yumşaq təsir göstərir, qarqarada isə infeksiyalara qarşı bir qoruyucu vasitə kimi çıxış edir.

Necə istifadə olunur?

– Çay kimi: Qurudulmuş nar qabığını xırdalayıb 1 stəkan qaynar suda 5–10 dəqiqə dəmləmək

-Qarqara üçün: Qaynadılmış nar qabığı suyu

-Xarici istifadə: Dəmləməni pambıqla problemli nahiyəyə çəkmək

Hər şeydə olduğu kimi, nar qabığından istifadədə də ölçüyə diqqət yetirmək vacibdir. Həddindən artıq istifadə qəbizlik, ürəkbulanma, zəhərlənmə əlamətləri yarada bilər. Xüsusilə hamilə qadınlar, uşaqlar və xroniki xəstəlikləri olan insanlar nar qabığını həkim məsləhəti olmadan istifadə etməməlidir.

Dəniz