İtlərin genetik SİRRİ: Çoxunda canavar DNT-si aşkarlandı

Alimlər müasir itlərin çoxunda az da olsa canavar DNT-si tapıldığını müəyyən ediblər.

Az24.az xəbər verir ki, Amerika Təbiət Tarixi Muzeyi və Smitson Milli Təbiət Tarixi Muzeyinin alimləri 2 700-dən çox it və canavarın genomunu təhlil edərək müasir itlərin DNT-sində canavara aid izlərin olduğunu ortaya çıxarıblar.

Araşdırmaya görə, canavarlarla məqsədli şəkildə cütləşdirilən Çexoslovakiya canavar iti və Saarloos canavar itində canavar DNT-sinin miqdarı 23–40% arasında dəyişir.

Adi it cinsləri arasında isə Böyük Anqlo-Fransız üçrəngli tazısı 4.7–5.7% ilə ən yüksək göstəriciyə malikdir. Maraqlıdır ki, balaca ölçüsü ilə tanınan Çihuahua cinsində belə təxminən 0.2% canavar DNT-si tapılıb.

Tədqiqatçılar bildirir ki, canavar DNT-si yüksək olan itlər daha yadlara qarşı şübhəli, müstəqil və əraziçi davranış sərgiləyir. Canavar genləri aşağı olan itlər isə daha mehriban və asan öyrədilə bilən kimi xarakterizə olunur.

Bundan əlavə, canavar genlərinin itlərin qoxu alma qabiliyyətini gücləndirdiyi və Tibet mastifi kimi cinslərin yüksək dağlıq ərazilərə uyğunlaşmasına kömək etdiyi müəyyən edilib.

Dəniz