“İPhone” istifadəçilərinə XƏBƏRDARLIQ – Telefonlarınız bloklana bilər

Son günlər “iPhone” istifadəçiləri üçün təhlükəli yeni dələduzluq sxemi ortaya çıxıb. Bu barədə məşhur “Just Use” adlı YouTube kanalının müəllifi və texnobloger Aleksandr Biryukov öz videosunda xəbərdarlıq edib.

Haxerlər süni şəkildə sistem bildirişləri göndərərək istifadəçiləri aldatmağa çalışırlar; bu bildirişlər iOS sistemindən gəlmiş kimi göstərilir və Apple ID daxil etməyi tələb edir. Belə bir bildirişə daxil olan istifadəçi dərhal öz Apple ID login və şifrəsini kiberhücumçulara ötürür, nəticədə onların hesabı ələ keçirilə və cihazlara tam nəzarət əldə oluna bilər.

Kiberfırıldaqçılar məlumatları ələ keçirdikdən sonra iPhone-ları Activation Lock funksiyası ilə “Lost Mode” rejiminə keçirərək cihazı tam bloklayırlar və sonra istifadəçidən pul tələb edirlər. Bu tələblər bəzən cihazın blokunun açılması üçün ödəniş tələb etməklə yanaşı, məlumatların silinməsi və ya şəxsi məlumatların yayılması kimi hədələrlə müşayiət olunur. Mütəxəssislər bildirirlər ki, hətta ödəniş edildikdə də cihazın blokdan çıxarılması təmin edilməyə bilər və bu, yalnız əlavə fırıldaqçılıq növüdür.

Bu cür hücumların qarşısını almaq üçün istifadəçilər heç vaxt Apple ID parolunu tanımadıqları və ya şübhəli bildirişlərə daxil etməməli, rəsmi Apple dəstək kanalları xaricində heç bir giriş məlumatını paylaşmamalıdırlar. Əlavə olaraq, hesablar üçün iki faktorlu identifikasiya sistemini aktiv etmək təhlükəsizliyi xeyli artırır və belə fırıldaqçılıqlardan qorunmağa kömək edir.

Qeyd edək ki, “Apple” heç vaxt parol, iCloud və ya Apple ID məlumatlarını bildirişlər yolu ilə tələb etmir; belə hallarda linklərə və ya bildirişlərə daxil olmamaq daha təhlükəsizdir.

Dəniz