Hamilə qadın qarın boşluğu açılmadan əməliyyatla uşaq dünyaya gətirdi

İsrailin Petah-Tikva şəhərində yerləşən Rabin Tibb Mərkəzinin həkimləri dünyada ilk dəfə gec hamiləlik dövründə olan qadına qarın boşluğunu açmadan robotik-laparoskopik əməliyyat həyata keçiriblər.

Az24.az xəbər verir ki,  23 yaşlı Tsofiya Leyboviçdə əvvəlcə kəskin bağırsaq iltihabı aşkarlanıb, daha sonra Kron xəstəliyi diaqnozu qoyulub. Hamiləliyin 32-ci həftəsində onun vəziyyəti kritikləşib və təcili şəkildə robotik rezeksiya əməliyyatı aparılıb.

Kolorektal cərrahiyyə şöbəsinin rəhbəri doktor Yan Uaytın sözlərinə görə, bu cür hallarda adətən açıq əməliyyat aparılır və bu, çox vaxt vaxtından əvvəl doğuşa səbəb olur. Lakin həkimlər ilk dəfə olaraq hamiləliyi qorumaq üçün minimal invaziv laparoskopik müdaxilə seçiblər.

Əməliyyatı doktor Uayt, professor Asnat Valfiş və professor Eran Hadar daxil olmaqla onlarla mütəxəssis icra edib. Müdaxilə uğurlu alınıb və Leyboviç bir neçə həftə sonra sağlam qız uşağı dünyaya gətirib.

Mütəxəssislər bildirirlər ki, dünyada analoqu olmayan bu əməliyyat hamilə qadınlarda ağır bağırsaq xəstəliklərinin müalicəsi üçün yeni imkanlar açır.