Əyləc pedalı boşaldıqda nə etməli? – Sürücülərə VACİB TÖVSİYƏLƏR

Avtomobildə əyləc pedalı boşalarsa, panikaya düşməmək və düzgün ardıcıllıqla hərəkət etmək həyati əhəmiyyət daşıyır.

Belə vəziyyətdə görülməli əsas tədbirlər bunlardır:

İlk növbədə sakitliyi qorumaq lazımdır. Panika yanlış qərarlara səbəb ola bilər və vəziyyəti daha da ağırlaşdıra bilər.

Dərhal əyləc pedalını bir neçə dəfə sürətlə basıb buraxın. Bəzən əyləc sistemindəki təzyiq müvəqqəti itir və pompalama ilə qismən bərpa oluna bilər.

Əgər nəticə yoxdursa, mühərrik əyləcindən istifadə edin. Sürəti azaltmaq üçün sürətlər qutusunu tədricən aşağı salın. Avtomatik ötürmədə isə “L”, “2” və ya “1” rejiminə keçin. Sürəti qəfil aşağı salmaqdan çəkinin ki, avtomobil sürüşməsin.

Əl əyləcindən ehtiyatla istifadə edin. Onu birdən-birə çəkmək olmaz. Əl əyləcini yavaş-yavaş qaldıraraq avtomobilin arxa təkərlərinin kilidlənməsinin qarşısını alın.

Ətraf mühiti diqqətlə izləyin və xəbərdarlıq siqnallarını yandırın. Digər sürücülərə təhlükəli vəziyyətdə olduğunuzu bildirmək üçün işıqları və səs siqnalını istifadə edin.

Mümkünsə, avtomobili yol kənarına, boş sahəyə, yoxuşa və ya təhlükəsiz maneəyə doğru yönəldin. Yoxuşa doğru hərəkət sürəti təbii şəkildə azalda bilər.

Avtomobil dayandıqdan sonra mühərriki söndürün və maşını hərəkətdən tam dayandırın. Daha sonra avtomobili istifadə etməyin və texniki yardım çağırın.

Mütəxəssislər tövsiyə edirlər ki, əyləc sisteminin nasazlığı ciddi risk yaratdığından vaxtında texniki baxış, əyləc mayesinin və şlanqların mütəmadi yoxlanılması bu cür halların qarşısını almağa kömək edir.

Dəniz