Evdə demək olar ki, hamının var: Dəfnə yarpağının bilinən və bilinməyən FAYDALARI

Mətbəxdə əsasən yeməklərə dad vermək üçün istifadə edilən dəfnə yarpağı əslində təkcə ədviyyat deyil. Xalq arasında bu bitkinin sağlamlıqla bağlı müxtəlif məqsədlərlə istifadə edildiyi də deyilir. Son illər dəfnə yarpağının faydaları ilə bağlı maraq daha da artıb.

Dəfnə yarpağının ən çox istifadə edildiyi sahələrdən biri həzmlə bağlı problemlərdir. Bildirilir ki, bu bitkidən hazırlanan çay mədə köpü və həzm zamanı yaranan narahatlığı azalda bilər. Xüsusilə ağır yeməklərdən sonra dəfnə yarpağı çayına üstünlük verənlər az deyil.

Xalq təbabətində dəfnə yarpağının tənəffüs yolları üçün də istifadə edildiyi qeyd olunur. Bəzi insanlar burun tutulması və soyuqdəymə zamanı dəfnə yarpağını qaynadaraq buxarını qəbul edirlər. Bu üsulun nəfəs yollarını açmağa kömək etdiyi deyilir.

Dəfnə yarpağı ilə bağlı maraq doğuran digər məqam isə onun sakitləşdirici təsirə malik olmasıdır. Çay şəklində istifadə edildikdə gərginliyi azaltmağa və rahatlamağa kömək edə biləcəyi bildirilir. Bu səbəbdən axşam saatlarında istifadə edənlər də var.

Bununla yanaşı, mütəxəssislər xəbərdarlıq edirlər ki, dəfnə yarpağından həddindən artıq istifadə etmək düzgün deyil. Xüsusilə xroniki xəstəlikləri olan şəxslər və hamilə qadınlar bitki çaylarını içməzdən əvvəl mütləq həkimlə məsləhətləşməlidirlər.

Qeyd edək ki, təbii bitkilər sağlamlığa dəstək vasitəsi kimi istifadə olunsa da, ciddi sağlamlıq problemləri zamanı yalnız bitkilərlə kifayətlənmək tövsiyə edilmir. Belə hallarda həkimə müraciət etmək vacibdir.

Altay