Azərbaycanda bu dövlət qurumu LƏĞV EDİLDİ

Naxçıvan Muxtar Respublikasında Tibbi Sosial-Ekspert Komissiyası ləğv edilib.

Az24.az xəbər verir ki, müvafiq qərar Naxçıvan Muxtar Respublikasının Baş nazirinin birinci müavini Elşad Əliyev tərəfindən qəbul olunub.

Qərara əsasən, “Naxçıvan Tibbi Sosial-Ekspert Komissiyasının yaradılması və ştat cədvəlinin təsdiq edilməsi haqqında” 2016-cı il 5 dekabr tarixli, 114 nömrəli qərarın 1-ci hissəsi də ləğv edilib. Həmçinin bildirilib ki, bu qərardan irəli gələn məsələlərin həlli Naxçıvan Muxtar Respublikasının Əmək və Əhalinin Sosial Müdafiəsi Nazirliyinə həvalə olunur. Qərar imzalandığı gündən qüvvəyə minib.

Qeyd edək ki, Naxçıvan Tibbi Sosial-Ekspert Komissiyası 2008-ci ildə yaradılıb. Komissiyanın əsas məqsədi sağlamlıq imkanları məhdud olan şəxslərin tibbi-sosial ekspertizasının aparılması, əlillik dərəcəsinin və səbəbinin müəyyən edilməsi, əmək qabiliyyətinin qiymətləndirilməsi, eləcə də reabilitasiya ehtiyaclarının müəyyən olunması olub. Bu qurumun rəyləri əsasında vətəndaşların sosial müavinətlərə, reabilitasiya vasitələrinə və digər sosial təminat mexanizmlərinə çıxışı formalaşdırılırdı.