Alimlərdən ciddi xəbərdarlıq: Qitələr birləşəcək, insanlıq məhv olacaq

Bristol Universitetinin alimləri milyonlarla il sonra Yerin qitələrinin yenidən birləşərək “Pangea Ultima” adlı nəhəng superqitə formalaşdıracağı halda, planetdə temperaturun dözülməz səviyyələrə qədər yüksələcəyi barədə xəbərdarlıq ediblər. Tədqiqatçılara görə, belə şərait həm insanların, həm də digər məməlilərin yaşamasını mümkünsüz edə bilər.

Aparılan modelləşdirməyə əsasən, superqitə yarandıqda okean təsirindən uzaq geniş quru sahələri formalaşacaq və bu, isti havanın daha çox “tutulmasına” səbəb olacaq. Nəticədə bəzi bölgələrdə temperaturun +40–50°C-dən yuxarı qalxacağı, rütubət səviyyəsinin isə həyati təhlükə yaradacaq dərəcəyə çatacağı bildirilib.

Uzun zaman kəsiyində Günəşin parlaqlığının artması və eyni dövrdə güclənə biləcək vulkanik fəaliyyətin atmosferə daha çox karbon qazı buraxması riskləri daha da yüksəldir. Bu üç amil birlikdə planetdə istiliyin kəskin artmasına, qitənin böyük hissəsinin yaşanmaz səhraya çevrilməsinə səbəb ola bilər.

Tədqiqat göstərir ki, Pangea Ultima formalaşdıqda quru sahələrinin yalnız kiçik bir hissəsi məməlilərin yaşaması üçün yararlı qala bilər. Alimlər bildirirlər ki, bədən temperaturunu tənzimləmə qabiliyyətinə malik canlılar belə istiliklə mübarizə aparmaqda çətinlik çəkəcəklər.

Mütəxəssislər qeyd edirlər ki, bu proqnoz yaxın zamanda baş verəcək bir təhlükə olmasa da, planetin uzunmüddətli inkişafında qarşıya çıxa biləcək ekstremal dəyişiklikləri göstərən vacib elmi siqnaldır.

Dəniz