Bu tarixdə gözünüz göydə olsun – Çox nadir hadisəyə şahidlik edəcəksiniz

2027-ci il avqustun 2-si dünya astronomiya tarixində xüsusi iz qoyacaq. Həmin gün son yüzilliyin ən uzun tam Günəş tutulmalarından biri müşahidə olunacaq.

Mütəxəssislərin məlumatına görə, tutulma zamanı bəzi bölgələrdə 6 dəqiqə 23 saniyəyədək tam qaranlıq qeydə alınacaq. Bu müddət 1991–2114-cü illər arasında qurudan görünəcək ən böyük göstəricilərdən biri hesab olunur.

Az24.az xəbər verir ki,  ayın kölgəsi əvvəlcə Atlantik okeanının üzərində yaranaraq ardınca bir sıra ölkələrdən keçəcək. Tutulmanın əsas marşrutu İspaniyanın cənubu, Mərakeş, Əlcəzair, Tunis, Liviya, Misir, Sudan, Səudiyyə Ərəbistanı, Yəmən və Somali ərazilərini əhatə edəcək.

Astronomların xüsusi diqqət çəkdiyi nöqtə isə Misirdir — Luksor şəhərində tam qaranlıq altı dəqiqəni keçəcək və bu da regionu tutulmanı izləmək üçün ideal mərkəzə çevirəcək.

Uzun sürən qaranlığın səbəbi Yerin və Ayın mövqeləri ilə bağlıdır. Alimlər bildirirlər ki, həmin tarixdə Yer Günəşdən nisbətən uzaqda, Ay isə Yerə daha yaxın olacaq. Bu astronomik uyğunluq tutulmanın müddətini qeyri-adi dərəcədə uzadır.

Bu nadir hadisəni dünyanın müxtəlif yerlərindən milyonlarla insanın izləyəcəyi gözlənilir və artıq turizm şirkətləri tutulma marşrutu boyunca xüsusi müşahidə turları təklif etməyə başlayıb.

Dəniz