İşə qəbul olma şansınızı artırın – CV hazırlayarkən nələrə qiqqət etməlisiniz?

CV iş axtarışında ilk təəssüratı formalaşdıran ən vacib sənədlərdən biridir. “HR” (İnsan resursları) mütəxəssisləri bir CV-ni orta hesabla cəmi bir neçə saniyəyə qiymətləndirirlər. Bu səbəbdən məlumatların səliqəli, oxunaqlı və işə uyğun şəkildə təqdim olunması işə qəbul şansını ciddi artırır.

Əvvəlcə CV-nin ümumi görünüşü sadə və peşəkar olmalıdır. Qarmaqarışıq dizayn, çox rəng və həddindən artıq vizual elementlər diqqəti yayındıra bilər. CV-nin yuxarı hissəsində ad, əlaqə vasitələri və varsa “LinkedIn” linki yerləşdirilməlidir ki, “HR” (İnsan resursları) mütəxəssisi məlumatları rahatca görə bilsin.

CV-nin ən mühüm hissələrindən biri qısa peşəkar xülasədir. Bu bölmədə 2–3 cümlə ilə kim olduğunuzu, hansı sahədə təcrübə topladığınızı və əsas üstünlüklərinizi vurğulamaq lazımdır. Məsələn, özünüzü belə təqdim edə bilərsiniz: “3 illik təcrübəyə malik rəqəmsal marketinq mütəxəssisi, SEO və sosial media sahəsində uğurlu nəticələr əldə etmişəm.” Bu cür xülasə CV-ni oxuyan şəxsə dərhal aydın mesaj verir.

İş təcrübəsi bölməsində uzun izahlardan daha çox nəticələrə fokuslanmaq tövsiyə olunur. Şirkətlər sadəcə nə iş gördüyünüzü deyil, həmin işdə hansı nəticələr əldə etdiyinizi bilmək istəyir. Bu səbəbdən əvvəlki işlərdə qazandığınız göstəriciləri konkret şəkildə yazmaq daha təsirlidir. Trafikinizi artırmısınızsa, satışları yüksəltmisinizsə və ya komanda işinin səmərəliliyini artırmısınızsa, bunu rəqəmlərlə göstərmək CV-ni daha güclü edir.

Bacarıqlar bölməsində yalnız bilik və təcrübəniz olan sahələri qeyd etməyiniz vacibdir. Texniki bacarıqlar – məsələn, “MS Office”, “Photoshop”, CRM sistemləri və digər proqram bilikləri – mütləq yer almalıdır. Bununla yanaşı, komanda işi, ünsiyyət bacarığı, problem həll etmə kimi yumşaq bacarıqları da göstərmək CV-nin dəyərini artırır.

Təhsil və sertifikatlarla bağlı məlumatlar qısa və dəqiq yazılmalıdır. Əgər müraciət etdiyiniz işlə bağlı əlavə kurslar və ya sertifikatlar varmısa, bunlar mütləq CV-də öz əksini tapmalıdır. Bu cür sənədlər sizə əlavə üstünlük qazandırır və inkişaf etməyə açıq olduğunuzu göstərir.

CV-ni bütün vakansiyalara eyni formada göndərmək doğru yanaşma deyil. Hər iş elanının öz tələbləri olduğuna görə CV-ni həmin vakansiyaya uyğunlaşdırmaq məsləhətdir. Tələblərdə hansı bacarıqlar və təcrübələr qeyd olunubsa, onları CV-də vurğulamaq sizi seçilən namizədlər arasında daha önə çıxarır. “HR” (İnsan resursları) mütəxəssisləri belə uyğunlaşdırılmış CV-ləri daha yüksək qiymətləndirirlər.

Sonda CV-ni göndərməzdən əvvəl mütləq yazı səhvlərini yoxlamaq lazımdır. Orfoqrafik və qrammatik xətalar CV-ni qeyri-peşəkar göstərir və işə qəbul şansını azalda bilər. Təcrübəli “HR” (İnsan resursları) mütəxəssisləri bu cür detallara çox ciddi yanaşır.

Düzgün və səliqəli hazırlanan CV sizi müsahibəyə bir addım daha yaxınlaşdırır. Aydın struktur, nəticəyə yönəlik məlumatlar və vakansiyaya uyğunlaşdırılmış məzmun həm diqqət çəkir, həm də peşəkarlığınızı göstərir.

Altay