Gültəkin Hacıbəyli Azərbaycana bu səbəbdən deportasiya edilmir

Son günlər Gültəkin Hacıbəylinin Türkiyədən Azərbaycana deportasiya olunub-olunmayacağı ilə bağlı müzakirələr aktuallaşıb. Prosesin uzanması müxtəlif suallar doğurur. Maraqlıdır, Gültəkin Hacıbəyli niyə hələ də Azərbaycana deport olunmur?

Az24.az mövzu ilə bağlı siyasi şərhçi Cavanşir Abbaslı konkret.az-a açıqlama verib.

C.Abbaslı bildirib ki, Gültəkin Hacıbəyli Ramiz Mehdiyev işi üzrə istintaqa cəlb edilən şəxslər sırasındadır və artıq onunla bağlı prosedurlar da başlanıb:

“Görünən odur ki, onun Azərbaycana gətirilməsi prosesi reallaşacaq. Türkiyə qanunlarına əsasən, Hacıbəyli kimi şəxslərin deportasiya qərarına etiraz etmək hüquqları var. Bu proses 15 gün davam edir və həmin şəxs deportasiyanın qanunsuz olduğunu əsaslandırmalıdır. Əsaslandırma olmadığı halda deportasiya həyata keçirilir”.

Siyasi şərhçinin sözlərinə görə, Gültəkin Hacıbəyli bu hüququndan istifadə edib və son paylaşımında Avropa Məhkəməsinə müraciət olunduğunu bəyan edib:

“Düşünürəm ki, o, bu 15 günlük müddətdə maksimum çalışacaq ki, Azərbaycana deportasiya olunmasın, bunun qanunsuz olduğunu sübut etsin. Amma buna nail olması inandırıcı görünmür”.

Abbaslı əlavə edib ki, prosesin Ramiz Mehdiyev və Əli Kərimli kimi şəxslərlə bağlı istintaq işi fonunda aparıldığı nəzərə alınarsa, Gültəkin Hacıbəylinin deportasiyasının reallaşacağı daha ehtimallıdır:

“Onun Azərbaycana gətirilməsi baş tutacaq və o, bu iş üzrə məsuliyyətə cəlb olunacaq”.