Zelenski “yenilənmiş sülh planı” barədə danışdı: “Ukraynanın şərtləri dəyişməzdir”

Ukrayna Prezidenti Volodimir Zelenski bu gün ABŞ və Avropa tərəfdaşları ilə aparılan sülh danışıqları barədə yeni açıqlama verib.

AZ24.az xəbər verir ki, Ukrayna lideri hazırda müzakirə olunan “yenilənmiş sülh planı” əvvəlki variantdan fərqli olaraq daha qısa və konkretləşdirilib, lakin Ukraynanın əsas prinsipləri dəyişməz qalır.

Zelenskinin sözlərinə görə, ABŞ-ın təqdim etdiyi ilkin 28 maddəlik sənəd yenidən işlənərək 20 maddəyə endirilib. Kiyev hər bir diplomatik təşəbbüsə açıqdır, lakin sülh yalnız ölkənin suverenliyi, ərazi bütövlüyü və təhlükəsizlik zəmanətləri qorunduğu təqdirdə mümkündür.

O bildirib ki, Ukraynanın sülhə razılaşması üçün “güzəştə getməyəcəyi bəndlər” mövcuddur və bu mövqe beynəlxalq tərəfdaşlara da aydın şəkildə çatdırılıb. Zelenski Avropa ölkələrini prosesdə daha aktiv rol almağa çağıraraq, təhlükəsizlik arxitekturasının yalnız ABŞ və Rusiya danışıqları ilə müəyyən edilə bilməyəcəyini qeyd edib.

Məlumata görə, sülh planı ətrafında həm Avropa İttifaqında, həm də ABŞ administrasiyasında fikir ayrılıqları davam edir. Bəzi ölkələr sənədin bəzi hissələrinin Ukrayna üçün riskli ola biləcəyini, digərləri isə müharibənin sonlanması üçün kompromislərin qaçılmaz olduğunu bildirir.

Bununla belə, Zelenski Kiyevin hazırkı mövqeyinin qəti olduğunu deyib: “Biz davamlı və ədalətli sülh istəyirik. Bu, yalnız Ukraynanın suverenliyinə hörmət olduğu halda mümkündür.”

Sülh planı ilə bağlı növbəti görüşlərin yaxın günlərdə davam etdiriləcəyi gözlənilir.