Türkiyəli məşhur aktyor Murat Cemcir reanimasiyaya yerləşdirilib

Türkiyənin tanınmış aktyoru Murat Cemcir keçirdiyi qəfil səhhət problemi səbəbilə xəstəxanaya yerləşdirilib.

AZ24.az xəbər verir ki, bu barədə Türkiyə mətbuatı məlumat yayıb.

Məlumatda bildirilir ki, 49 yaşlı sənətçi çərşənbə günü evində halı pisləşdikdən sonra xəstəxanaya aparılıb və ilkin olaraq reanimasiya şöbəsində müalicə altına alınıb.

Aktyorun daxili qanaxma keçirdiyi bildirilib. Bu səbəbdən həkimlər onun vəziyyətinə nəzarəti gücləndirib və intensiv müalicə tətbiq edib.

Aktyorun yaxın günlərdə palataya köçürüləcəyi və ümumi vəziyyətinin yaxşılaşmağa doğru getdiyi qeyd olunub.