Gündə cəmi bir neçə dəqiqə hərəkət etmək ömrü uzadır

Hərəkət uzun və sağlam ömrün ən vacib şərtlərindən biridir. Amma müasir elmi nəticələr göstərir ki, sağlam qalmaq üçün günün yarısını idman zalında keçirməyə ehtiyac yoxdur. Əksinə, balanslı, davamlı və orta intensivlikdə fiziki aktivlik bədən üçün ən ideal variantdır.

Az24.az xəbər verir ki, aparılan elmi tədqiqatların ümumi nəticəsinə görə, həftə ərzində orta intensivlikdə təxminən 2–3 saat hərəkət
(sürətli gəzinti, yüngül qaçış, pilləkən çıxmaq və s.) və ya qısa, amma güclü intensivlikdə məşq seansları sağlamlığı qorumaq üçün tamamilə yetərlidir.

Bu miqdar bədənin həm ürək-damar sistemini gücləndirir, həm də uzunmüddətli xəstəlik riskini azaldır.

Araşdırmalar göstərir ki, həddindən artıq ağır və uzunmüddətli məşqlər bədəni yükləyir, stress hormonlarını artırır, bəzən isə immun sistemini zəiflədə bilər.

Yəni sağlamlıq üçün əsas məqsəd “çox” deyil, düzgün ölçüdə hərəkətdir.

Bir çox insan yalnız günün bir hissəsi idman edib, qalan saatları oturaq keçirir. Bu isə nəticələri zəiflədir. Mütəxəssislər bildirir ki, gün ərzində uzun müddət hərəkətsiz qalmaq qan dövranını ləngidir, maddələr mübadiləsini zəiflədir və idman etsəniz belə, mənfi təsirlərin bir hissəsi qalır.

Buna görə də əsas diqqət gün boyu aktivliyə yönəlməlidir: hər 1–2 saatdan bir ayağa qalxmaq, kiçik gəzinti etmək, qısa hərəkətlər etmək kifayət edir.

Elmi nəticələr göstərir ki, mütəmadi, lakin yüngül və orta səviyyəli fiziki fəaliyyət stresi azaldır, enerji artırır, yuxunu yaxşılaşdırır.

İnsanların çoxu ağır məşq planlarını davam etdirə bilmir, buna görə də daha mülayim aktivlik daha dayanıqlı nəticə verir.

Mütəxəssislər sağlam həyat üçün aşağıdakıları tövsiyə edir:

– Həftədə 3–4 dəfə 30–40 dəqiqəlik yüngül və ya orta intensivlikdə məşq

-Gündə 7–10 min addım

-Hər 1–2 saatda bir neçə dəqiqə ayağa qalxmaq

-Çox ağır məşqlərlə bədəni aşırı yükləməmək

-Gündəlik həyatda aktiv olmaq: pilləkən çıxmaq, gəzinti, ev işləri

Bu yanaşma həm daha realdır, həm də bədənin uzunmüddətli sağlamlığı üçün ən məqsədəuyğun yoldur.

Dəniz