Türkiyə və Belarus sülh danışıqlarında vasitəçi ola bilər – Lavrov

Dörd ilə yaxındır davam edən Rusiya-Ukrayna münaqişəsinin həlli üçün danışıqlar davam edir.

Az24.az xəbər verir ki, Rusiya Xarici işlər naziri Sergey Lavrov bildirib ki, Türkiyə və Belarus Ukrayna ilə Rusiya arasında danışıqlarda vasitəçi ola bilər.

Lavrov həmçinin ABŞ-dan Donald Trump tərəfindən hazırlanmış sülh planının bir versiyasını rəsmi şəkildə alacaqlarını gözlədiklərini qeyd edib.

Rusiyanın açıqlamasına görə, planın bir sıra maddələri Moskva üçün qəbul ediləndir, digər məsələlər isə tərəflər arasında müzakirə olunmalıdır.

Rusiya Prezidentinin köməkçisi Yuri Uşakov isə ABŞ-ın 28 maddədən ibarət sülh planının bir çox hissəsinin Rusiyanın tələblərinə uyğun olduğunu, lakin digər maddələrin tərəflər arasında razılaşdırılması lazım olduğunu bildirib.

Ukrayna Prezidenti Volodimir Zelenskiy də ABŞ-ın planı üzərində iş aparıldığını, ölkəsinin milli maraqlarına “heç vaxt xəyanət etməyəcəyini” vurğulayıb.