Azərbaycanda qorxunc “yol terroru” – STATİSTİKA

2025-ci ilin yanvar-sentyabr aylarında ölkə ərazisində ümumilikdə 905 yol-nəqliyyat hadisəsi baş verib. Bu da 2024-cü ilin müvafiq dövrü ilə müqayisədə 12.2 faiz azalma deməkdir.

Az24.az xəbər verir ki, bu hadisələr nəticəsində zərər çəkən şəxslərin sayı da 11.9 faiz azalaraq 1 264 nəfər təşkil edib. Zərərçəkənlərdən 507 nəfəri həlak olub, 757 nəfəri isə müxtəlif dərəcəli xəsarətlər alaraq yaralanıb.

Hadisələrin başvermə vaxtına gəldikdə, 44.5 faizi gündüz, 42.6 faizi gecə saatlarında, 12.9 faizi isə toran vaxtı qeydə alınıb. Eyni zamanda, bütün hadisələrin 30.6 faizi həftəsonu – şənbə və bazar günlərinə təsadüf edib.

Qeydə alınmış yol-nəqliyyat hadisələrinin böyük əksəriyyəti, yəni 85 faizi yaşayış məntəqələrinin daxilində baş verib. Bu hadisələr nəticəsində həlak olanların sayı ötən ilin müvafiq dövrünə nisbətən 7.3 faiz azalaraq 353 nəfər, yaralananların sayı isə 16.8 faiz azalaraq 708 nəfər olub.

Baş verən yol-nəqliyyat hadisələrinin 39.1 faizi nəqliyyat vasitələri ilə piyadaların iştirakı, 38.8 faizi bir neçə nəqliyyat vasitəsinin toqquşması, 22.1 faizi isə bir nəqliyyat vasitəsinin iştirakı ilə baş verib.

Cins bölgüsünə görə, yol-nəqliyyat hadisələri nəticəsində həlak olanların 73.2 faizini, yaralananların isə 70 faizini kişilər təşkil edib.