Xroniki yorğunluqdan belə xilas olun

Xroniki yorğunluq müasir həyat tərzinin ən geniş yayılmış problemlərindən biridir. Uzunmüddətli zehni gərginlik, hərəkətsizlik və fasiləsiz iş rejimi zamanla yuxululuq, diqqətin zəifləməsi, göz və əzələ yorğunluğu kimi əlamətlərlə özünü göstərir. Mütəxəssislərin fikrincə, bu vəziyyətin qarşısını almaq üçün sadə, lakin müntəzəm vərdişlər kifayət qədər təsirli ola bilər.

Az24.az xəbər verir ki, yüksək ixtisaslı nevroloq və refleksoloq İqor Orlov Pravda.Ru-ya müsahibəsində xroniki yorğunluğun aradan qaldırılmasında aktiv istirahətin və gəzintinin xüsusi rol oynadığını bildirib. Onun sözlərinə görə, fiziki və zehni fəaliyyət arasında balans yaratmaq, bədəni hərəkətə gətirmək yorğunluq hissini əhəmiyyətli dərəcədə azaldır.

Mütəxəssis qeyd edib ki, açıq havada qısa gəzinti, yüngül idman hərəkətləri və ya özünə masaj etmək sinir sistemini aktivləşdirir, qan dövranını yaxşılaşdırır və beyin fəaliyyətini stimullaşdırır. Hətta bir neçə dəqiqəlik fasilə belə gün ərzində məhsuldarlığın artmasına müsbət təsir göstərə bilər.

“Üzünüzü sərin su ilə yumaq, üz və ovuclarınızı ovuşdurmaq, boyun nahiyəsini yüngül masaj etmək və sadə çiyin məşqləri yerinə yetirmək gərginliyi azaldır və orqanizmin tonusunu yüksəldir”, – deyə Orlov bildirib.

Həkim əlavə edib ki, uzun müddət fasiləsiz işləmək orqanizmi həddindən artıq yükləyir. Buna görə də iş prosesində müntəzəm fasilələr vermək, ekran qarşısında uzun müddət qalmamaq və bədəni hərəkətsiz vəziyyətdə saxlamamaq tövsiyə olunur.

Mövzu ilə bağlı fikirlərini bölüşən Moskva klinikasının rəhbəri, psixiatr və narkomaniya üzrə mütəxəssis Ruslan İsayev isə xroniki yorğunluq sindromunun (CFS) daha ciddi əlamətlərinə diqqət çəkib. Onun sözlərinə görə, istirahətdən sonra da keçməyən güclü zəiflik, yüngül fiziki fəaliyyətdən sonra yorğunluğun artması, “beyin dumanı”, diqqət pozuntuları, əzələ və oynaq ağrıları bu sindromun əsas göstəriciləri hesab olunur.

Mütəxəssislər vurğulayırlar ki, belə hallar uzun müddət davam edərsə, özünümüalicə ilə kifayətlənmək olmaz və həkimə müraciət etmək vacibdir. Erkən mərhələdə görülən tədbirlər xroniki yorğunluğun dərinləşməsinin qarşısını almağa kömək edə bilər.

Dəniz