Xolesterini azaltmaq üçün 5 FAYDALI ÇAY

“Pis” xolesterinin səviyyəsini azaltmaq məqsədilə ən yaxşısı şəkərsiz çay içmək, ən pis halda isə onu bal ilə şirinləşdirməkdir. Çay qəbul etmək balanslaşdırılmış qidalanma ilə birlikdə ürək sağlamlığının qorunmasına kömək edir. Üstəlik, bəzi çay növləri “pis” xolesterinin azalmasına yardım edən faydalı birləşmələr ehtiva edir.

1. Yaşıl çay

Yaşıl çayın tərkibində güclü antioksidantlar olan katexinlər var. “Health” nəşrinin yazdığına görə, bu maddələr qanda “pis” xolesterinin səviyyəsini azaldır.

Araşdırmalar göstərib ki, yaşıl çay ümumi xolesterini və “pis” xolesterini 5 faizə qədər azalda bilir. Ümumi xolesterinin hətta 1 faiz azalması belə ürək-damar xəstəlikləri riskinin 2–3 faiz azalması ilə əlaqələndirilir.

2. Qara çay

Bu içkinin tərkibində “pis” xolesterinin azalmasına kömək edən polifenollar mövcuddur. Bu təsir ürək-damar xəstəlikləri riski yüksək olan insanlarda daha güclü ola bilər.

Tədqiqatlar həmçinin göstərir ki, qara çayın polifenolları orqanizmdə yağ və şəkərin mənimsənilməsini azaldır, qan dövranını yaxşılaşdırır və sağlam qan təzyiqinin qorunmasına dəstək verir.

3. Zəncəfil çayı

Zəncəfil çayı daha çox həzm sisteminə faydaları ilə tanınır. Lakin o, həm də iltihabı azalda bilən və ürək sağlamlığını dəstəkləyən maddələr ehtiva edir. Araşdırmalar göstərib ki, zəncəfil “pis” xolesterinin və triqliseridlərin səviyyəsini azalda bilər. Triqliseridlər qandakı yağ növlərindən biridir və onların yüksək səviyyəsi ürək-damar xəstəlikləri riskini artırır.

Bu çayı hazırlamaq üçün zəncəfil dilimlərini isti suda dəmləmək kifayətdir. Tərkibində kofein olmadığı üçün günün istənilən vaxtında içilə bilər.

4. Ulun (oolong) çayı

Ulun çayı özünəməxsus yumşaq dadı ilə seçilir və həm isti, həm də soyuq şəkildə istifadə oluna bilər. Onun tərkibində xolesterini azaldan katexinlər və digər polifenollar var. Bu maddələr yağların həzmində iştirak edən lipaza fermentini bloklaya bilər ki, bu da bağırsaqlarda mənimsənilən yağ miqdarının azalmasına kömək edir.

5. Hibiskus çayı (Məkkəgülü)

Araşdırmalar göstərib ki, hibiskus çayı “pis” xolesterinin səviyyəsini azaldır, eyni zamanda “yaxşı” xolesterini artırır. “Yaxşı” xolesterinin yüksək olması ürək sağlamlığı ilə əlaqələndirilir.

Bu təsirlərin əsas səbəbinin hibiskusun tərkibində olan antosianinlər adlı antioksidantlar olduğu bildirilir.

Xolesterini azaltmaq üçün çay içməklə bağlı məsləhətlər

“Pis” xolesterini azaltmaq üçün çayı şəkərsiz için. Əgər buna çətinlik çəkirsinizsə, çayı bal və istəyə görə limonla şirinləşdirə bilərsiniz. Kofeinin miqdarına diqqət yetirin, axşam saatlarında isə yuxunu pozmamaq üçün zəncəfil və ya hibiskus kimi kofeinsiz çaylara üstünlük verin.

Çayı ürək üçün faydalı olan qidalanma rejimi ilə — meyvələr, tərəvəzlər, tam taxıllı məhsullar və paxlalılarla birlikdə qəbul edin.

Mütəxəssislərin fikrincə, hibiskus çayı ürək sağlamlığını dəstəkləyir və çəkinin nəzarətdə saxlanmasına kömək edir. Bu, aşağı kalorili və antioksidantlarla zəngin bir içkidir.

Dəniz