Narkotik istintaqı: Ümit Karan da saxlanıldı

Türkiyə futbolunun tanınmış simalarından Ümit Karan İstanbulda “Sabiha Gökçen Hava Limanı”nda polis tərəfindən saxlanılıb.

AZ24.az Türkiyə mediasına istinadən xəbər verir ki, bu addım İstanbul Respublika Baş Prokurorluğunun məşhurlara qarşı apardığı narkotiklərlə bağlı genişmiqyaslı istintaq çərçivəsində atılıb.

Keçmiş futbolçu hava limanında nəzarətə götürülərək ifadə üçün polis idarəsinə aparılıb. Bildirilir ki, istintaq təkcə Ümit Karanla məhdudlaşmır və digər tanınmış şəxsləri də əhatə edir.

Qeyd edək ki, Ümit Karan vaxtilə Türkiyə millisinin və “Qalatasaray”ın aparıcı hücumçularından biri olub. Karyerasını başa vurduqdan sonra isə məşqçi və idman şərhçisi kimi fəaliyyət göstərib.