Avtomobil niyə tüstüləyir? – Mühərrikdən gələn GİZLİ MESAJLAR

Avtomobilin egzoz borusundan tüstü çıxması ilk baxışda adi bir hal kimi görünə bilər. Xüsusilə soyuq havalarda bu, çox vaxt normal hesab olunur. Lakin tüstünün rəngi, sıxlığı və davamlılığı mühərrikdə baş verən texniki problemlər barədə mühüm siqnallar verir. Bu əlamətləri vaxtında düzgün dəyərləndirmək həm böyük xərclərin, həm də ciddi nasazlıqların qarşısını ala bilər.

Ağ tüstü adətən iki fərqli səbəbdən yaranır. Soyuq havalarda mühərrik işə düşən zaman görünən nazik ağ tüstü kondensasiya olunmuş su buxarıdır və təhlükəli sayılmır. Lakin mühərrik qızdıqdan sonra da qalın və davamlı ağ tüstü çıxırsa, bu, soyuducu mayenin yanma kamerasına sızdığını göstərə bilər. Belə vəziyyət silindr başlığı contasında problem və ya çatlama ehtimalını artırır.

Mavi tüstü mühərrikin yağ yandırdığını göstərən ən ciddi əlamətlərdən biridir. Bu hal əsasən piston halqalarının aşınması, klapan keçirmələrinin sıradan çıxması və ya turbonun nasazlığı ilə bağlı olur. Yağın yanması həm mühərrikin gücünü azaldır, həm də yağ sərfiyyatını kəskin artırır. Uzun müddət diqqətsiz qalarsa, mühərrikin əsas hissələrinə ciddi ziyan vura bilər.

Qara tüstü isə yanacaq-hava qarışığının düzgün nizamlanmadığını göstərir. Mühərrikə normadan artıq yanacaq daxil olduqda tam yanma baş vermir və nəticədə qara tüstü əmələ gəlir. Bu problem çox vaxt injektorların çirklənməsi, hava filtrinin tutulması, yanacaq təzyiqi ilə bağlı nasazlıqlar və ya elektron idarəetmə sistemindəki səhvlərlə əlaqələndirilir. Qara tüstü həm yanacaq sərfiyyatını artırır, həm də ətraf mühitə zərər verir.

Boz rəngə çalan tüstü isə bəzi hallarda avtomatik ötürməli avtomobillərdə transmissiya mayesinin yanma kamerasına daxil olması ilə əlaqədar ola bilər. Bundan əlavə, PCV klapanının sıradan çıxması da bu cür tüstüyə səbəb ola bilər.

Egzozdan çıxan tüstünün yalnız rənginə deyil, qoxusuna və davametmə müddətinə də diqqət yetirmək vacibdir. Şirin qoxu adətən antifrizin yandığını, kəskin yanıq qoxusu isə yağ və ya elektrik problemlərini göstərə bilər.

Egzoz borusundan çıxan tüstü avtomobilin “dili” sayılır. Bu dili düzgün oxumaq sürücüyə mühərrikin real vəziyyəti haqqında vaxtında məlumat verir. Şübhəli hallarda avtomobili gecikdirmədən ustaya göstərmək həm təhlükəsizlik, həm də maddi baxımdan ən doğru addımdır.

Dəniz