İranda polis idarəsinə basqın – ölənlər və yaralananlar var

İranda polis idarəsinə edilən hücum nəticəsində ölən və yaralananların sayı artıb.

Az24.az xəbər verir ki, Elam vilayətinin Məlikşah şəhərində iğtişaşçılar polis idarəsinə daxil olmağa cəhd ediblər.

Bu zaman silahlı qarşıdurma baş verib və üç nəfər həyatını itirib.

“Mehr” Xəbər Agentliyinin məlumatına əsasən, ölənlərdən biri hüquq-mühafizə orqanlarının əməkdaşı, digər ikisi isə etirazçılardır. Hadisə zamanı bir neçə nəfərin də yaralandığı bildirilir.

Xatırladaq ki, İranda ümumxalq etirazları çərçivəsində bundan əvvəl üç nəfərin öldüyü açıqlanmışdı.

Qeyd olunur ki, son illərdə İranda milli valyutanın dollara qarşı kəskin ucuzlaşması və yüksək inflyasiya nəticəsində ölkədə son üç ilin ən genişmiqyaslı etiraz aksiyaları keçirilir. (milli.az)