Yeni il süfrələrinin bəzəyi: Hinduşka ləvəngisi necə hazırlanır?

Yeni il süfrələrinin ənənəvi və sevilən yeməklərindən biri olan hinduşka ləvəngisi zəngin dadı və xüsusi hazırlanma üsulu ilə seçilir. Xüsusilə bölgələrdə bayram və özəl günlərdə süfrələrin bəzəyi hesab olunan bu yemək qozlu içliyi ilə tanınır.

Hinduşka ləvəngisinin əsas xüsusiyyəti onun içliyində istifadə olunan qoz və soğanın xüsusi nisbətdə hazırlanmasıdır. Qoz ləpəsi xırda-xırda doğranır və ya çəkilir, soğan isə incə doğranaraq az miqdarda yağda qovrulur. Daha sonra qoz, soğan, duz, qara istiot və istəyə görə nar şirəsi əlavə edilərək ləvəngi içliyi hazırlanır.

Hazırlanan içlik hinduşkanın içərisinə doldurulur. Quşun ağzı tikilir və ya möhkəm bağlanır ki, bişmə zamanı içlik çölə çıxmasın. Üzərinə kərə yağı və zəfəran suyu sürtülərək sobaya qoyulur.

Hinduşka ləvəngisi əsasən zəif odda, uzun müddət bişirilir. Bu zaman ətin yumşaq qalması və qurumaması üçün vaxtaşırı öz suyu ilə isladılması tövsiyə olunur. Düzgün bişirildikdə hinduşka həm yumşaq, həm də ləzzətli olur.

Süfrəyə verilərkən hinduşka ləvəngisi bütöv halda və ya dilimlənmiş şəkildə təqdim olunur. Yanında göyərti, nar dənələri və müxtəlif qarnir növləri ilə servis edilir. Bu yemək xüsusilə Yeni il süfrəsində qonaqların ən çox maraq göstərdiyi təamlardan sayılır.

Sevinc