Maşının mühərriki qızdırıbsa, bunları edin

Maşının mühərrikinin qızması ciddi texniki problemdir və vaxtında müdaxilə edilməzsə, mühərrikin sıradan çıxmasına səbəb ola bilər. Bu halın yaranma səbəblərini və görülməli tədbirləri bilmək sürücünü böyük xərclərdən xilas edə bilər.

Mühərrik niyə qızır?

Ən çox rast gəlinən səbəblərdən biri soyutma sistemində nasazlıqdır. Radiatorda antifrizin azalması və ya tamamilə bitməsi mühərrikin normal temperaturda işləməsinə mane olur. Eyni zamanda, antifrizin keyfiyyətsiz olması və ya vaxtında dəyişdirilməməsi də qızmaya yol aça bilər.

Radiatorun çirklənməsi və ya içəridən tutulması da istiliyin ötürülməsini zəiflədir. Ventilyatorun işləməməsi, termostatın ilişib açılmaması və su nasosunun sıradan çıxması mühərrikin tez qızmasına səbəb olan texniki amillər sırasındadır.

Yağlama sistemində problem olduqda, yəni mühərrik yağı azaldıqda və ya köhnəldikdə, sürtünmə artır və bu da temperaturun yüksəlməsinə gətirib çıxarır. Bundan əlavə, çox yüklə hərəkət, uzun müddət tıxacda qalmaq, yüksək sürətlə davamlı sürmə və kondisionerin həddindən artıq istifadəsi də mühərrikə əlavə yük yaradır.

Mühərrik qızanda nə etmək lazımdır?

İlk növbədə avtomobili təhlükəsiz yerdə saxlayın və mühərriki söndürün. Qapağı dərhal açmaq olmaz, çünki radiator və antifriz yüksək təzyiq altında olur və yanıq riski yaradır. Mühərrikin bir qədər soyumasını gözləmək vacibdir.

Əgər temperatur bir qədər yüksəlibsə, sobanı (salon isidicisini) maksimum rejimə salmaq mühərrikdən istiliyin çıxmasına kömək edə bilər. Antifrizin səviyyəsini yalnız mühərrik soyuduqdan sonra yoxlayın. Səviyyə aşağıdırsa, uyğun antifriz əlavə etmək mümkündür.

Ventilyatorun işləyib-işləmədiyini müşahidə edin. Əgər ventilyator işə düşmürsə, problem elektrik sistemində və ya relelərdə ola bilər. Mühərriki təkrar işə saldıqdan sonra temperatur yenidən sürətlə qalxarsa, avtomobili sürməmək və texniki servisdən kömək almaq daha təhlükəsizdir.

Problemin həlli və qarşısının alınması

Mühərrikin qızmasının qarşısını almaq üçün soyutma sisteminin mütəmadi yoxlanması vacibdir. Antifrizin səviyyəsi və keyfiyyəti nəzarətdə saxlanmalı, radiator vaxtaşırı təmizlənməlidir. Termostat, su nasosu və ventilyatorun işlək vəziyyətdə olması mühərrikin sağlamlığı üçün əsas şərtlərdəndir.

Həmçinin, mühərrik yağı vaxtında dəyişdirilməli və avtomobilin istehsalçısının tövsiyə etdiyi yağdan istifadə olunmalıdır. Davamlı qızma halları müşahidə edilərsə, problemi özbaşına həll etməyə çalışmaq əvəzinə, mütəxəssisə müraciət etmək ən doğru addımdır.

Unutmayın ki, mühərrikin qızmasına vaxtında reaksiya vermək həm təhlükəsizliyinizi, həm də avtomobilinizin ömrünü qoruyur.

Dəniz