Pendir yemək demans riskini azaldır – ARAŞDIRMA

Bəşəriyyətin ən sevilən ləzzətlərindən biri olan pendir, sağlamlığımız üçün gözlənilməz və demək olar ki, möcüzəvi bir fayda daşıya bilər.

İsveçdə təxminən 25 il ərzində 27 mindən çox yetkin şəxsin izlənildiyi genişmiqyaslı bir araşdırma, gündəlik olaraq yüksək yağlı pendir istehlakının demans (bunama) riskini əhəmiyyətli dərəcədə azalda biləcəyini üzə çıxarıb. Lund Universiteti tərəfindən aparılan bu uzunmüddətli tədqiqat, xüsusilə bri, gouda, cheddar və mozzarella kimi yağ tərkibi 20 faizdən çox olan pendirləri gündə 50 qramdan artıq yeyənlərin zehni sağlamlığı qorumaqda daha üstün mövqedə olduğunu göstərir.

Onilliklərdir formalaşmış “yağlı qidalar sağlamlığa zərərlidir” düşüncəsini sarsıdan bu tapıntılar sağlam yağların beyin funksiyaları üzərində müsbət təsiri barədə yeni müzakirələrə yol açıb. Araşdırmanın nəticələrinə görə, hər gün kifayət qədər yağlı pendir yeyən şəxslərdə demansa tutulma riski çox az pendir istehlak edənlərlə müqayisədə 13 faiz daha aşağıdır. Maraqlıdır ki, eyni qoruyucu təsir az yağlı pendirlərdə, süd və ya qatıq kimi fermentləşdirilmiş məhsullarda müşahidə olunmayıb. Bu isə yüksək yağlı pendirlərin özünəməxsus tərkibinin beyin sağlamlığı üçün xüsusi bir açar ola biləcəyini düşündürür.

Dünya üzrə milyonlarla insana təsir edən və 2050-ci ilə qədər xəstəlik hallarının üç dəfə artacağı proqnozlaşdırılan demansa qarşı hələlik qəti müalicə mövcud deyil. Bu səbəbdən mütəxəssislər qidalanma vərdişlərinin qoruyucu bir mexanizm kimi istifadə edilə biləcəyini vurğulayırlar. Bununla belə, alimlər tək bir qidanı möcüzə kimi təqdim etməyin doğru olmadığını da xatırladırlar. 25 ili əhatə edən bu araşdırmada iştirakçıların həyat tərzinin zamanla dəyişə biləcəyi ehtimalı, pendir ilə beyin sağlamlığı arasındakı bu maraqlı əlaqənin mexanizmini anlamaq üçün əlavə tədqiqatlara ehtiyac olduğunu göstərir.

Dəniz